Индивидуално пензиско осигурување

1. Задолжителното пензиско и инвалидско осигурување врз основа на генерациска солидарност (прв столб) е осигурување организирано според принципот на тековно финансирање (pay-as-you-go), што значи дека сегашните осигуреници плаќаат за сегашните пензионери. За ова осигурување се грижи Фондот на пензиското и инвалидското осигурување. Преку овој столб се обезбедува остварување на права од пензиско и инвалидско осигурување во случај на старост, инвалидност и смрт, што значи дека се исплаќа дел од старосната пензија, инвалидска пензија, семејна пензија, како и најнизок износ на пензија.

2. Задолжителното капитално финансирано пензиско осигурување (втор столб) е осигурување врз основа на капитализација на средствата, при што постои тесна поврзаност и зависност помеѓу обемот на вложените средства – придонесите и идните пензиски надоместоци, што ги остварува секое лице. Имено, овој начин на осигурување е заснован врз принцип на собирање на средства преку плаќање на придонеси на индивидуални сметки. Овие средства понатаму се инвестираат и добивката, намалена за трошоците на работењето на системот, се додава на средствата на индивидуалните сметки. Преку овој столб се обезбедува остварување право на пензиско осигурување во случај на старост, односно се исплаќа старосна пензија (дополнително на пензијата од првиот столб).

Секој осигуреник може да избере само еден задолжителен пензискиот фонд.

Висината на придонесот кој се пренесува во задолжителен пензиски фонд изнесува 6% од бруто платата, а во Фондот на ПИОМ останува придонес во висина од 12,4% од бруто платата.

3. Доброволното капитално финансирано пензиско осигурување (трет столб) е осигурување врз основа на капитализација на средствата, на доброволна основа. Во него можат да бидат вклучени сите лица кои сакаат да обезбедат подобра материјална сигурност покрај задолжителното осигурување, како и оние кои не се опфатени со задолжително осигурување (во првиот и вториот столб). Покрај тоа, со третиот столб се овозможува и основање и финансирање на професионални пензиски шеми.

Секој осигуреник може да има една доброволна индивидуална и една професионална сметка во доброволен пензиски фонд. Вложените средства се инвестираат според строго утврдени законски прописи, со што се обезбедува највисока заштита на интересите на осигурениците и на нивните средства.

За членовите на третиот столб нема ограничување во однос на висината и фреквенцијата на уплата на доброволен придонес.

Средствата, вложени во приватните капитално финансираните фондови се инвестираат според строго утврдени законски прописи, со што се обезбедува највисока заштита на интересите на членовите и на нивните средства. Во приватните задолжителни пензиски фондови секој член има своја индивидуална сметка, на која се чуваат средствата од придонесите кои секој член ги издвојува од својата плата. Средствата издвоени од плата, заедно со приносот од нивното инвестирање влегуваат во формирањето на износот на пензија.

Фактори кои придонесуваат кон гарантирање на сигурноста на средствата во приватните фондови:

• Средствата на приватните пензиските фондови се одвоени од друштвата кои управуваат со нив и се чуваат кај така наречени чувари на имот на пензиски фондови;
• Правилата на инвестирање на средствата од вториот и третиот столб се строго дефинирани;
• Во случај на измама, или криминална активност, каде како последица би се исцрпиле средствата на задолжителниот пензиски фонд, предвидена е точно дефинирана заштита односно предвидено е од државниот буџет да се изврши уплата во задолжителниот пензиски фонд во висина од 80% од загубата;
• Предвидени се постојана контрола на институциите на пензискиот систем и високи казни за незаконско работење.

Чувар на имотот на Триглав пензиски фонд е Комерцијална Банка АД Скопје.

Членови на Триглав задолжителен пензиски фонд можат да бидат осигурениците кои задолжително се опфатени со задолжителното капитално финансирано пензиско осигурување и осигурениците кои по сопствен избор ќе се вклучат во задолжителното капитално финансирано пензиско осигурување, согласно Законот за задолжително капитално финансирано пензиско осигурување и Законот за пензиското и инвалидското осигурување и на Триглав задолжителен пензиски фонд му пристапуваат преку склучување на договор за членство.

Осигуреник може да стекне членство во Триглав задолжителен пензиски фонд на два начини:

• со потпишување на договор за членство во фондот и со регистрација во Регистерот на членови, кој го води Агенцијата,
• со распределба во Триглав задолжителен пензиски фонд по случаен избор, од страна на Агенцијата, т.е. Фондот на ПИОМ, во случај кога осигуреникот, кој е должен да стане член на задолжителен пензиски фонд, не потпишал договор за членство во периодот за избор на задолжителен пензиски фонд

Еден осигуреник во исто време може да биде член само во еден задолжителен пензиски фонд и во тој пензиски фонд може да има само една сметка.

Осигуреник, кој прв пат потпишува договор за членство во Триглав задолжителен пензиски фонд и дотогаш не бил член на ниту еден задолжителен пензиски фонд, има право на еднострано раскинување на договорот по пат на писмен поднесок, доставен до Триглав пензиско друштво во рок од 8 работни дена од датумот на потпишувањето на договорот за членство. По истекот на рокот од 8 работни дена, од датумот на потпишување на договорот, осигуреникот стекнува членство во задолжителниот пензиски фонд и Друштвото за управување воспоставува индивидуална сметка за членот кој го потпишал договорот.

Осигуреник кој е задолжително опфатен во задолжителното капитално финасирано пензиско осигурување, договорот за членството во Триглав задолжителен пензиски фонд може да го склучи во рок од три месеци од вработувањето, односно пристапувањето на задолжителното пензиско инвалидско осигурување.

По вработувањето, односно пристапувањето на задолжителното пензиско инвалидско осигурување, Агенцијата за супервизија на пензиско осигурување, МАПАС, врши времено распоредување на осигуреникот, при што Триглав задолжителен Пензиски фонд за времено распоредениот член воспоставува индивидуална подсметка, во рамки на посебната сметка во Триглав задолжителен пензиски фонд.

Членот на Триглав задолжителен пензиски фонд може слободно да премине и да се зачлени во друг задолжителен пензиски фонд.

Член кој има индивидуална сметка во Триглав задолжителен пензиски фонд може да премине во задолжителен пензиски фонд управуван од друго друштво со потпишување договор за премин со друштвото кое управува со задолжителниот пензиски фонд во кој преминува, потпишување изјава за согласност за премин и плаќање соодветен надоместок.